KITAA 4G: KILA ALHAMISI MWANAKWETU.

SILAHA ANANG’ATA KAMA SUARES

MCHEZAJI wa timu ya soka ya Home Boys, Silaha ibrahimu, juzi alitolewa uwanjani kwa kadi nyekundu baada ya kumng’ata mwenzake wa Matairi FC.

Silaha alifanya hivyo wakati wa mchezo wa Vijana Cup uliochezwa kwenye Uwanja wa Kimara, jijini Dar es Salaam ambao ulimalizika kwa Matairi kuibuka kidedea kwa mabao 3-1.

Wakati Abdusalam Jamali wa Matairi akielekea kufunga bao la pili, Silaha alimkaba na kumng’ata kwenye shingo na kufanya mchezaji huyo kushindwa kuzifumania nyavu.

Mwamuzi Juma Bundala alimfuata mchezaji huyo na kumpa kadi nyekundu ambapo awali alikuwa ameshapewa kadi ya njano kwa kucheza rafu uwanjani.

 

Eti wamebadilishana jezi dakika ya 65!

WACHEZAJI wa timu ya Nyuki na Mzinga waliamua kubadilishana jezi wakati mechi ya ligi ya Bodaboda ikiendela katika Uwanja wa Bwawani Mbezi, jijini Dar es Salaam.

Tukio hilo lilitokea dakika ya 65 ya mchezo ambapo wachezaji watatu kutoka timu zote walibadilishana jezi na kuwaacha mashabiki wakiwa midomo wazi.

Walipoulizwa kwanini wamefanya hivyo, walisema walitaka kufanya tukio mbalo litakuwa la kihistoria katika ligi hiyo ambayo inaelekea nusu fainali.

Wapinzani V Wananchi ngoma droo

TIMU za Wapinzani na Wananchi zimeshindwa kutambiana baada ya kutokufungana katika mchezo wao wa kombe la mbuzi uliochezwa kwenye Uwanja wa Stop Over, jijini Dar es Salaam.

Akizungumzia mchezo huo, kocha wa Wapinzani, Daudi Sauti, alisema japo hawakufanikiwa kuona lango la Wananchi, lakini wachezaji wake wamecheza mpira wa kiwango cha juu na watajipanga vyema kwenye mchezo ujao.

 

Wacomoro wa Yanga wasepa na boda boda ya mtu

KIJANA Saidi Mkakazi mkazi wa Ubungo RiverSide, alijikuta akiangua kilio kwa kile kilichotokea baada ya Ngaya kuchapwa mabao 5-1 na Yanga.

Kabla ya mchezo huo uliochezwa Comoro, kijana huyo alibisha na kusema kuwa mara nyingi Yanga huwa inafungwa inapotoka nje ya Tanzania.

Said alikwenda mbali zaidi na kutoa Bodaboda yake akisema kama Yanga watashinda basi ichukuliwe na aliokuwa akibishana nao.

Bada ya Ngaya kukubali kichapo ikiwa ugenini, madereva wenzake walichukua boda boda hiyo, kitendo kilichomfanya kuangua kilio kama mtu aliyefiwa.

Hata hivyo, wenzake walimwonea huruma na kumrudishia mali yake hiyo na ndipo walipomuonya kubeti.